إعتزال محمد عبد الشافي لكرة القدم .. عمره ما زعل حد

محمد عبد الشافي لاعب الزمالك قرر يعلق حذائه .. يعني يعتزل كرة القدم.. وبالمناسبة دي حابب اتكلم عنه.. لانه تجربة لازم نستنسخها..

محمد عبد الشافي واحد من قليلين قدروا يجمعوا الناس كلها على حبهم.. يعني مش هتلاقي اهلاوي بيشتم عبد الشافي .. او صعب تلاقي حد يكرهه..

عبد الشافي اللي عمره 38 سنة.. مش هتلاقيله مشكلة واحدة مع اي حد.. من ناشئ في الزمالك وهو 7 سنين.. ثم تسريحه من النادي بدون سابق انذار.. وانتقاله لنادي إنبي.. ثم غزل المحلة .. ثم الزمالك كلها هتلاقيها لعب وتركيز في الملعب وبس.. إجهز علشان تلعب حاضر.. ريح علشان مش مقتنع بيك حاضر..

حتى لما يجيله عرض يلعب في السعودية في اهلي جدة.. الموضوع تم بمنتهى السلاسة .. ملاوعش.. لا خالص انتقل بمنتهى السلاسة .. وعمل شعبية كبيرة جدا في السعودية.. بيحبوه قوي هناك.. يعني هو خد بطولة كأس ولى العهد موسم 2014- 2015، ولقب الدورى السعودى موسم 2015- 2016، وكأس خادم الحرمين الشريفين عام 2016، وكأس السوبر السعودى في عام 2016، ليتوج بجميع البطولات السعودية.. كاول لاعب مصري يعمل كدا..

مش هتلاقيله خناقة على تجديد عقده.. مش هتلاقيله مشكلة مع اي لاعب في النادي .. مش هتلاقيله اي مشهد حب يعمل ترند ولا ياخد اللقطة..

حتى لما اتصاب في مباراة القمة واتكسر دراعه في تداخل مع وليد سليمان.. وحب البعض يتاجر في الموضوع.. واننا هنروح نعمل محضر في القسم.. ظهر وليد سليمان مع عبد الشافي في لقطة حلوة ووليد بيزوره وهو بيضحك.. ابتسامة خلصت على الموضوع..

طوال مسيرته في الملاعب مخدش كارت احمر.. وانذارات تتعد على الايد.. وشوف اي لقطة تداخل فيها مع لاعب هتلاقيه واقف مبتسم وبيتطمن عليه.. كمان لقطته المميزة لما بعت لعمال غرف الملابس في غزل المحلة دعوات في السعودية علشان يعملوا عمرة.. لانه متربي معاهم في فترة لعبه في غزل المحلة.

عبد الشافي تسبب في اصابة لاعب تليفونات بني سويف بالرباط الصليبي بعد ما رقصه فاللاعب توازنه اختل ووقع.. بعد ما مرواغة منه.. عبد الشافي حرفيا ملمسوش… لكن بكي عبد الشافي بشدة.. واتكفل بمصاريف العملية على نفقته الخاصة.. قارن بين موقفه مثلا وموقف ميدو من لاعب نادي الاعلاميين..

ورغم اني لا اصدق ال منصور على بعضهم.. بس احمد مرتضى منصور نشر مع اخبار اعتزال عبد الشافي موقف ليه معاه وقال : “:اقسم بالله محمد عبد الشافي اللاعب الوحيد الذي عرضت عليه زياده عقده رفض وقال الحمد لله عقدي مكفيني”..

مع اعتزال عبد الشافي احنا هنفتقد .. شخص خلوق جدا.. وقدوة.. وحد متربي 10 مرات .. حد تفتخر بيه كإنسان نضيف ونقي.. شخص لازم نستنسخه في ملاعبنا المصرية..

هتوحشنا يا شيفو ..