عقبت الإعلامية لميس الحديدي، علي بيان الشركة القابضة لتوزيع الكهرباء الذي أعلنت فيه الالتزام ببرنامج تخفيف الأحمال، ويكون بالتناوب مع كل محافظات مصر، وعلى رأس كل ساعة، وذلك من خلال برنامجها كلمة أخيرة الذي تقدمه على شاشة قناة أون .
وقالت لميس الحديدي : مافهمتش حاجة يعني هتقطع الكهرباء على رأس الساعة ولا ذيل الساعة؟ هل هيبقى كده على رأس كل ساعة ؟ ولا مناطق معينة ؟ هل ده بيان موجه للمواطن ولا مين؟ طيب ماهي الساعات التي سوف تنقطع الكهرباء على رأسها ؟ وماهي آلياتها ؟ هتختار أنهي ساعة بالتحديد؟ وإمتى مانركبش الاساسنير؟ دي حياة الناس وبيترتب عليها انقطاع المياه؟ طيب ممكن الناس تبقى عارفة فينزلوا الشارع في التوقيت ده من الحر؟.
وتابعت لميس: لو بنتحدث عن نظام جديد مكمل معانا لفترة طويلة هذا يقلقني؟ هل خلاص كده بيان مجلس الوزراء اللي قال تخفيف الأحمال سيتوقف منتصف الأسبوع مابقاش موجود هنطبق نظام القابضة لفترة طويلة؟.. هل هذا نظام مستمر لفترة طويلة وده في حد ذاته مقلق.
وأضافت قائلة: هناك مناطق في الصعيد وصلت فيها فترات انقطاع الكهرباء ست ساعات وفي المعادي ثلاث ساعات بينما الساحل الشمالي كان متلألئ ليه العمارات التي تحت الإنشاء فيها إنارة ده مش سلوك بلد عندها أزمة في الكهرباء؟.
كما أضافت: إحنا هنا لانتحدث عن عدالة توزيع الأضرار بنوزعه على الجزء السكني، رغم أنه الأكثر استهلاكا لكن السواحل منورة بشكل مستفز؟ وأنا كنت في الساحل الشمالي.
