نشر كمال فتحي صاحب مصنع موقف تعرض له من موظف الجمارك داخل مطار القاهرة الدولى أثناء عودته على رحلة مصر للطيران القادمة من الصين قبل يومين من انتهاء شهر رمضان.
وسرد صاحب الشكوى قائلاَ:« يمكن أول مره أعمل حاجه زي دي بس اللي حصل معايا ده ظلم، أنا راجع من الصين من حوالي 10 أيام، والى حصل جمرك مطار القاهرة صالة الوصول المطار الجديد كان معايا 4 شنط فيهم شنطة صغيرة فوق الطيارة عباره عن كارتلات قماش زي ما موضح في الصورة كمية كبيرة شوية، عدد 6 بكرات خيط تريكو عينات مواصفات مختلفة على سبيل العينات مش رايح الصين أجيب 6 بكرات للبيع والكارتلات الخاصة بهم مع العلم جمرك الكيلو رسمي من أي ميناء لا يتعدي 35 جنيه للكيلو.
وأضاف:”« كان معايا ملابسي الشخصية لأني كنت مقيم شهر ونصف واشتريت ملابس العيد لأولادي و6 أحذية أطفال، وأدوات الصيد كيس صغير في عدة صيد سمك عدد 2 لعبة أطفال منهم لعبة باظل لا تتعدى كف اليد كاتبهم في المحضر معاه لعب أطفال، والأدوية الخاص بيا».
وتابع:«بمجرد ما وصلت لموظف الجمرك قالي اتفضل 25.000 ألف جنيه قلتله ليه قالي جايب كارتلات كتير ، قلتله وفيها ايه أنا صاحب مصنع، ومكتوب في الباسبور ومعايا البطاقة والسجل، ومحتاج العينات دي
قالي عايز فواتيرها قلتله أنت فاهم بتقول ايه دي كارتلات وعينات قماش بناخدها ببلاش وبيتحايلوا علينا ناخدها ببلاش ازاي أقولهم هاتوا فواتير».
وأوضح: «كان رد الموظف لا مستنيك أنت تفهمني قلتله معايا 10.000الآف جنيه بحاول أنزل معاه قالي لا أحنا مش بنفاصل قلتله صل على النبي قالي مابصليش قلتله براحة شوية وماتزعقش قالي طيب هحجزهالك وخلى وردية الساعة 9 تطلعهالك
قلتله أعمل اللي أنتا عايزه لكن ماتزعقش علشان أنا كمان بعرف أزعق بس أنا صايم قالي أنا بقى مش صايم وأسمي “جورج” وهتشوف هعمل ايه علشان تدفع وأنت ساكت، قلتله شوف هتعمل ايه لاقيته عملهالي وديعه لحين السفر يعني لازم أسافر تاني بيهم بره مصر وأرجع بيهم تاني وأدفع تذكرة رايح جاي ووزن تاني قلتله أنت شايف ده صح؟!».
وأختتم مقدم الشكوى الذي نشرها عبر حسابه على موقع التواصل الإجتماعي فيس بوك:« لما قلتله أكتب كل حاجة عدد مارضاش زي عدد 2 لعبة أطفال ماتعممش قالي أنا عارف أنا بعمل ايه أستنى هناك قلت أدفع وخلاص قلتله هدفع قالي لا مش هرجعهالك أنا مش شغال عندك قلتله طيب عايز هدومي المستعملة ولعب العيال مستنينها بره قالي مش هتاخد حاجة، وأنا في غرفة الوديعة الموظف هناك بيقولي روح أستسمح جورج وقوله معلش قلتله أنت فاهم غلط أنا مش هعمل كده لوحتى حرقهم أدامي وكمان أنا مش جايب حاجه تستاهل كل ده».
