اتهم عدد من رواد موقع التواصل الاجتماعي «فيسبوك» بنك QNB، بالنصب على المواطنين وخصم مبالغ مالية من المودعين بدون علمهم.
وكتب عبد الحليم محمد، شكوى على إحدى جروبات الشكاوي قال فيها: «بنك Qnb، أسوأ خدمة عملاء وأسوأ بنك اتوجد في جمهورية مصر العربية، لم الاقيهم بيخصمو مبالغ بدون علمي تحت بند أصل حضرتك بتتعامل مع مواقع Apple فبيتخصم ١٠٪ تدبير عملة».
وأضاف: «يا جماعه أنا حسابي بالمصري وبدفع في apple بالمصري فتدبير عملة ايه ال حضراتكم بتدبروها ؟؟ بتخصم مني بناء ع ايه بدون علمي ؟؟ مين اداك اذن تخصم فلوس من فلوسي لصالحك من غير موافقتي ؟؟الاختلاس بقي علني كدة ؟؟».
وتابع: «بيخصمو الفلوس ده متجزأة في وسط المعاملات الي بعملها اونلاين ع اي حاجة علشان انت متاخدش بالك منها حاجة في قمة القرف يعني والنصب، الحاجة التانيه عملت ايداع ف حسابي وحولت فلوس لواحد صاحبي بعد الايداع فلقيت فيه 10% تانيين مخصومين، حضراتكم خاصمينها ليه اصل ده فوايد ونسبه بتتخصم من حضرتك علشان عملت ايداع واستخدمته قبل يوم ٢٣».
وأكمل: «طيب انا عامل ايداع علشان استخدمه مش علشان اتبرع بيه لحضراتكم صدقة جارية وبعدين ده Debit يعني حساب جاري اودع واسحب واتشقلب فين براحتي ملكش غير مصاريفك السنوية مش Credit يا فندم علشان يبقي ليه فوايد او نسبه او ميعاد بيلينج استخدم فيه فلوسي، لا اصل هو البنك بتاعنا كدة، ده ناهيك انك علشان توصلهم بتقعد ايام وسنين علشان حد يعبرك»
وأكد المواطن أنه قام بتسجيل المكالمة بعلم الموظفة، ليتم ارسال شكوى رسمية للبنك المركزي وهيئة الرقابة المالية ونيابة الأموال العامة، واتهام البنك بالاختلاس.
شكوى عبد الحليم لم تكن الأولى، أيضًا اشتكى أحمد إبراهيم، أن البنك خصم منه مبلغ كغرامة إيداع وسحب بنفس اليوم، وقال: «من حوالى اسبوع كنت محتاج ابعت فلوس لحد فى مكان بعيد فعملت ايداع بالمبلغ فى حسابى فى QNBAlAhli من خلال ATM وحولت المبلغ فى نفس اليوم من خلال انستا باى والدنيا تمام، اتفاجئت امبارح ان البنك خاصم منى مبلغ 87 جنيه ولما كلمتهم استفسر عن المبلغ ده كان ردهم كالتالى: حضرتك عملت ايداع من خلال ATM يوم …. واستخدمت المبلغ فى نفس اليوم فنزل عليك غرامه بالمبالغ دى!».
واشتكى أشرف سيد، من سحب 7% من قيمة تحويلات جاءت له من موقع PAYPAL، وكتب: «أنا عميل ببنك QNB و جالي تحويل من موقع PayPal و بعد ما سحبت المبلغ من حسابي لاقيت البنك خاصم مني مصاريف بقيمة ٧٪ من إجمالي التحويل تحت مسمى DCC-Markup Fee و ده بدون سبب او حتى اخطار».
كما اشتكى عدد كبير من مستخدمي البنك من سوء خدمة العملاء للمواطنين، وقال أحدهم: «بجد من أسوء الفروع وأسوء الموظفين إحنا يوميا بنتعامل مع البنك ده Qnbيوميا فرع سيتي ستارز، المعاملة السيئة من أول الأمن لغاية البنكير اللي بعد مابيخلص يروح رميلك الاشعار بتاعك ع الكونتر».
وأضاف: «الشبابيك بتفضل فاضية بال ١٠ دقايق عقبال ما يضربوا رقم وواقفين برة ع رجلينا فعلا بالإضافة إن بعض الموظفين مبيعرفوش طلب العميل يروح محوله ع زميله عشان هو مش عارف».
وكتب محمد سيد: «خدمه عملاء QNB أنتم شغالين ازاي، ساعه تقريبا وأنا عميل البنك ومحدش بيرد ومشغلين واحد كل 10ثوانى يقول مضيعش وقتك، امال دا اسمه ايه .. ضيع عمرك معنا فى الانتظار»، كما كتب محمد جوهري: «أسوء خدمة عملاء فعلا ومعاملة لا تليق ببنك المفروض إنه بنك كبير لما أقعد ساعة ونص انتظار وفي الاخر تنهوا المكالمة».
