شن الإعلامي الإذاعي أسامه منير هجوما حاداً على الإعلام المصري، والمطرب المهرجانات حسن شاكوش بعدما شغلت أزمة طلاقه الرأي العام مؤخرا.
كما نشر منير مقطع فيديو عبر حسابه على مواقع التواصل الإجتماعى، انتقد فيه اهتمام الإعلام المصري المبالغ بأزمة زواج وطلاق حسن شاكوش من ريم طارق.
وقال منير: «هل كون حسن شاكوش اتجوز وطلق في شهرين دي قضية تشغل المجتمع المصري والإعلاميين الكبار والقامات الكبيرة والبرامج اللي الاسبونسر بيدفع فيها بالملايين عشان يحط إعلانه».
وأكمل: «ده لو جواز وطلاق الملك تشارلز مش هيفردوا له الكمية دي. إيه اللي ورا ده أنا مش فاهم».
وانتقد منير خروج شاكوش وزوجته السابق، عبر البرامج التلفزيونية للحديث عن تفاصيل حياتهما الشخصية.
وأردف: «وإيه الموضوع والقذورات اللي عمالين نسمعها ما بين كانت متجوزة وجوزها عنده مرض جنسي. ونقلها المرض واتعالجت واتجوزتك وأنت ما تعرفش وغنيت لها اطلعي برا البيت».
وأضاف: «وأنت وأهلك وأهلها وفرح و4 مليون وشيخ الحارة وأم الحارة وأبو الحارة. أنا مش فاهم إيه اللي بيحصل».
ووجه منير رسالة للإعلاميين كافة، الذين يهتمون بالحديث عن القضية المثارة في الأيام الماضية، بشكل غير مفهوم، على حد وصفه.
وقال: «هل أحنا معندناش قضايا مهمة جدا تهم المجتمع يا أخواتنا يا إعلاميين، وتهم المواطن الكادح، تعليم صحة غلاء فلوس تأمين طبي، عشوائيات محليات قرارات وزارية، وإعلامنا كله بيجري ورا حسن شاكوش».
واختتم: «في حاجة غلط يا أنا غلط يا أنتوا غلط، أزاي سايبين العك ده كله وبنجري ورا حسن اتجوز وشاكوش أتطلق، أنتوا مصدقين نفسكم ولا مش فاهمين ولا ده مقصود؟».
