أول رد من صاحبة أزمة واقعة وادي دجلة بعد منعها من تناول أكل بيتي داخل النادي

وقالت العضوة:«توضيح هام أنا عضويتي متسحبتش زي ما مكتوب ومعرفش في عقوبة وقعت عليا ولا لا بس دا حصل مع ناس كتير غيري اخدوا غرامات مالية أو إيقاف عضوية لمدة 3 شهور.

نشرت إحدي عضوات نادى وادى دجلة، مشكلة تعرضت لها وهي منعها من تناول سندويتشات قامت بتجهيزها داخل المنزل لإفطار المغرب، وأن قد تواجه قرار  بوقف عضويتها 3 أشهر من قبل الإدارة.

وقال زينيب عبر  منشور لها عبر صفحتها على موقع التواصل الإجتماعي «فيس بوك» نادي وادي دجلة منع دخول أي أكل من برا النادي وبالاجبار ، مفيش غير أكل المطاعم ومنعني اكل سندوتشات جيباها من البيت حتى لما قلتلهم إني كنت صائمة، ودي شكوى جماعية كلنا بنشتكي على جروب النادي وهما مستمرين في نفس التعسف وفي ناس بتاخد سحب عضوية ووقف لمدة ٣ شهور وغرامات مالية عشان ياكلوا اكل بيتي في النادي.

 

وأضافت:« مدير الفرع شخصيا قالي اتصلي بخدمة العملاء واشتكينا، وده إجراء تعسفي كعادة القوانين التعسفية بتاعت نادي وادي دجلة زي ما كان منع المحجبات من دخول حمام السباحة البرايفت من غير اي سبب منطقي ، والنهاردة حصل معايا موقف في منتهى السخافة وقلة الذوق على حد وصفها».

وروت ما تعرضت له داخل النادي قائلة:« كنت صايمة ورايحة النادي وواخدة معايا ساندوتشات عملاها في البيت عشان ابقى افطر هناك مش عايزة اكل جاهز عشان كله بقى يقرف
المغرب اذن وطلعنا الساندوتشات ولسه بناكل راحت واحدة موظفة جاية قالت ليا الأكل الخارجي ممنوع مسموح بس أكل من مطاعم النادي قولتلها مباكلش من برا قالتلي دي تعليمات إدارة قولتلها معلش وسبتها ومشيت.

وأوضحت:« نادت واحد من الأمن جالنا وطلب الكارنيه وصوره الله أعلم هيعمل بيه ايه الموضوع ممكن يوصل لسحب عضوية وحصل لناس وقالنا ممنوع وهحاول اجيب لكم استثناء كلم حد قاله لا مسموح بس لانش بوكس أكل للأطفال، والحقيقة دمي اتحرق ورحت كلمت مدير الفرع (فرع النخيل) وقلت له اللي حصل وإن دا مش مقبول ومن حقك تمنع الأكل اللي في بهدلة زي الحلل والسمك والرنجة وما إلى ذلك إنما السندوتشات دي ايه مشكلتها ما انت فى النادي بتعمل سندوتشات جاهزة يعني، ورد عليا إن كله واحد ومينفعش امنع بتاع الحلة والرنجة واسمحلك انتي بالساندويتش، قولتله لا طبعا مفيش مقارنة ودي حاجة بديهية جدا انت ممكن تكتب ان الاكل المسموح بدخوله فقط هو الساندوتشات ويبقى غير كدة تمنعه ويبقى حقك.

وذكرت أيضاً:« وافرض أنا واحدة بتتعب من الأكل الجاهز أو مش معايا فلوس أجيب خلاص مجيش النادي يعني ولا اعمل ايه، طبعا فضل مصمم ان الساندوتش زيه زي اللي جاي رنجة وفسيخ نفس المدير اللي قبله اللي قالي لما نسمح بدخول المحجبات بيقولولنا طب اشمعنا الأطفال لا!، وده تعسف ع الفاضي وخلاص مالوش اي 30 لازمة وعدم منطقية
نهيت الحوار بإني بقوله على فكرة أنا يعتبر لحد دلوقتي مكلتش وأنا كنت صايمة بسبب الموقف دا رد بكل هدوء مش عايزة اقول كلمة تانية  قالي معلش آسف يا فندم
قولتله هصعد المشكلة دي على فكرة قالي براحتك طبعا اتصلي بخدمة العملاء واعملي فينا شكوى بس تقريبا كان مكسوف يقول اخبطي راسك في الحيط .

واختتمت:«دلوقتي ايه الجهة اللي نقدر نشتكي فيها التصرفات دي لان ناس كتير جدا متضررة من نفس التصرف ووصلت إن في ناس عضويتها اتسحبت وناس أتغرمت فلوس!!
وزارة الشباب والرياضة – مصر.